Boot

in Wikipedia, die vrye ensiklopedie
'n Boot met seile
'n Polisieboot in Venesië

'n Boot is enige tipe watervaartuig, gewoonlik groter as 'n skuit, maar heelwat kleiner as 'n skip wat meestal op die oop oseaan vaar. Ook sal kragbote, insluitend duikbote, na binne oorhel wanneer hulle 'n draai op die water maak, terwyl skepe na buite oorhel. Bote kan op riviere, damme, mere en aan die kus van die oseaan gebruik word. Dit word veral benut vir ontspanning, noodsaaklike vervoer (bv. op 'n lang rivier), as hengelplatform, of vir maritieme patrolliewerk.

Passasierskepe, vragskepe, tenkskepe, sleepbote, treilers, ligters, barkasse, motorbote en jolle hierdie en baie ander soorte vaartuie kan in groot getalle in die hawens van die wêreld gesien word. Sommige  is groot en ander is klein, sommige is mooi en vinnig en ander is onooglik en stadig. Maar elkeen is spesiaal ontwerp en gebou om die taak waarvoor dit bedoel is, so doeltreffend as moontlik uit te voer.

Motorbootmasjiene[wysig | wysig bron]

Motorbootmasjiene kan buiteboords of binneboords aangebring word, eg. word binne-in die vaartuig ingebou. Die krag word op die skroef oorgedra met 'n dryfas wat deur die agterstewe loop. Lg. is minder ingewikkeld omdat die motor, skag en skroef in 'n enkele eenheid gebou is, wat oor die hek van die vaartuig hang.

Barge[wysig | wysig bron]

Steenkoolbarge op die Ohiorivier, VSA

Veral in Europese hawens word vaartuie soos hierdie dikwels gebruik om stortladingvrag, veral steenkool, te vervoer. Hierdie barg word met sy eie dieselmasjien aangedryf, en hy is ontwerp om 'n groot vrag te dra. Snelheid is van mindere belang. Barge soos hierdie kan net in beskutte waters aangewend word en vermy die oop see.

Riviertenkskip[wysig | wysig bron]

Hierdie vaartuie word veral op die riviere van Europa gebruik om groot hoeveelhede vloeistowwe te vervoer. In hawens word hulle dikwels gebruik om brandstof of vars water na skepe te neem. Hierdie skepe word opsetlik smal gebou sodat hulle by nou plekke kan deurvaar.

Onderlosser[wysig | wysig bron]

Hierdie baggerskuit word gebruik om die sand en modder wat in die hawe uitgebagger is, diep in die see uit te gooi. Groot deure in die bodem val oop om die vrag uit te stort.

Jagte[wysig | wysig bron]

'n Skoener aan die Indonesiese kus

Baie soorte vaartuie word jagte genoem. Die bekendste is die seiljagte wat in binnelandse en kus­waters aangetref word. Die grootte wissel van jolle tot vaartuie so groot soos hierdie prag­tige skoener.

Groot plesiervaartuie word ook jagte genoem. Vandag word die tuie met dieselmotore aangedryf.

Sleepligters[wysig | wysig bron]

'n Ligter in Hamburg se hawe

Wanneer 'n groot vragskip vasmeer, is dit nie altyd moontlik om die hele vrag op die kaai af te laai nie. Dikwels word 'n gedeelte van die vrag dan op ligters gelaai wat langs die skip vasmaak. Die ligters word dan na plekke geneem waar die vrag verder hanteer kan word.

Veerbote[wysig | wysig bron]

Tussen Robbeneiland en Kaapstad loop 'n veerboot wat mense vervoer. Maar in sommige wêrelddele bestaan gereelde pontdienste vir motors, busse en selfs treine. Veerbote vir treine en motors vaar gereeld tussen die Britse Eilande en die vasteland van Europa, en tussen Duitsland en die Skandinawiese lande.

Drywende hyskrane[wysig | wysig bron]

Hierdie mobiele hyskrane word in menige groot hawens, ook dié van Suid-Afrika, aangetref. Hulle word veral gebruik om swaar dekvragte op en af van skepe te laai, en om swaar hawewerktuie soos droogdok-hekke te hanteer.

Bronverwysing[wysig | wysig bron]

* Kennis, Volume 1, 1980, bl. 57-59, ISBN 0-7981-0823-1

Eksterne skakels[wysig | wysig bron]